Влијание на социјалната поддршка врз осаменоста, депресијата и добросостојбата кај стари лица

Abstract

Продолжувањето на животниот век, порастот на бројот на стари луѓе и
иинтересот годините од животот да се поминат во што подобро здравје и понезависно
од другите резултирало со зголемување на интересот за стареењето. Старите лица многу
често се соочуваат со психосоцијални проблеми на осаменост и депресија, како и со
влошување на субјективната добросостојба, при што како најважен ризик фактор во
стручната литература се наведува отсуството на социјална поддршка во староста. Целта
на ова истражување е да се испитаат разликите помеѓу старите лица со различен степен
на социјална поддршка во однос на нивоата на осаменост, депресија и добросостојба,
како и влијанието на социјална поддршка врз осаменоста, депресијата и добросостојбата
кај старите лица. Примерокот на истражување го сочинуваат 80 испитаници на возраст
од 70 години и повеќе, поделени во две групи кои се разликуваат по степенот на
социјална поддршка која ја добиваат од семејството и пријателите. За собирање на
податоците користени се: Мултидимензионалната скала за перцепирана социјална
поддршка, UCLA скала за осаменост, Самоизвестувачка скала за депресија на Зунг и
Скала за перцепирана добросостојба. Добиените резултати покажаа статистички
значајни разлики помеѓу старите лица со различен степен на социјална поддршка врз
нивоата на осаменост, депресија и добросостојба, како и статистички значајно влијание
на социјалната поддршка врз осаменоста, депресијата и добросостојбата кај старите
лица. Истражувачките резултати се конзистетни со резултатите од други истражувања
кои се достапни во стручната литература.

Keywords:

стари лица, социјална поддршка, осаменост, депресија,
добросостојба