Влијание на сменската работа врз психофизичката добросостојба кај вработените

Abstract

Сменската работа претставува важен извор на нарушувања на здравјето и психофизичката добросостојба кај вработените во единиците за противпожарна заштита. Сепак, оваа служба мора да биде достапна 24 часа, со оглед на тоа што пожарите и несреќите бараат интервенирање од нејзините вработени и работењето во смени е често и неопходно, особено за пожарникарите. Целта на овој труд е да покаже дали постојат разлики помеѓу сменските работници и работниците со редовно работно време во рамки на единиците за противпожарна заштита, во однос на општата здравствена состојба, нивото на замор, квалитетот на спиење, нивото на анксиозност и нивото на депресија, како и дали сменската работа има влијание врз овие индикатори на психофизичката добросотојба кај вработените во противпожарните единици. Примерокот на истражување го сочинуваат 60 испитаници, од кои 30 се сменски работници, а 30 работници со редовно работно време, сите од машки пол, на возраст од 40 до 50 години, вработени во противпожарната заштита со полно работно време и со работен стаж од 5 години и повеќе. За собирање на податоците користени се: Прашалник за општа здравствена состојба, Прашалник за проценка на замор, Прашалник за квалитет на спиење, Прашалник за анксиозност и Прашалник за депресија. Истражувачките резултати покажуваат дека постојат статистички значајни разлики помеѓу сменските работници и работниците со редовно работно време во единиците за противпожарната заштита во однос на општата здравствена состојба, нивото на замор, квалитетот на спиење, нивото на анксиозност и нивото на депресија и дека сменската работа негативно влијае врз психофизичката добросостојба на вработените во противпожарните единици. Добиените резултати се во согласност со достапните истражувачки резултати во стручната литература.

Keywords:

противпожарна служба, сменска работа, вработени, психофизичка добросостојба