Опасности и несреќи при работа во шумарството во рс македонија

Abstract

Овој магистерски труд има за цел сеопфатно да ја истражи состојбата со
безбедноста и здравјето при работа во шумарството во Република Северна Македонија,
со посебен акцент на идентификување на ризиците, проценката на условите за работа и
анализа на институционалната и законската рамка. Шумарството претставува една од
најстарите, но и најризичните стопански дејности во земјата, бидејќи шумските
работници секојдневно се изложени на бројни механички, биолошки, хемиски и
психофизички ризици. Работата на отворен терен, во планински и непристапни области,
во комбинација со климатските екстреми и користење на опасна механизација, ја прави
оваа професија една од најопасните во поглед на повреди и смртни случаи.
Во трудот се анализираат клучните фактори кои влијаат врз нивото на безбедност
во шумарството, меѓу кои се организациските капацитети на јавните и приватните
шумски претпријатија, степенот на техничка опременост, достапноста и употребата на
лична заштитна опрема, како и културата на безбедност кај работниците. Преку анализа
на податоци од релевантни институции, како и теренски истражувања и примери од
практиката, се утврдува дека и покрај постоењето на законска рамка за безбедност и
здравје при работа, нејзината имплементација во шумарскиот сектор е недоволна и
нерамномерна. Во државните претпријатија постојат формални механизми за заштита,
но често недостига нивна практична примена, додека во приватниот сектор ситуацијата
е уште посложена поради недостиг на ресурси, обука и институционален надзор.
Истражувањето понатаму укажува дека психолошките и социолошките аспекти
имаат значајно влијание врз однесувањето на работниците на терен. Недоволната свест
за ризикот, навиките стекнати со долгогодишно искуство без обука, како и ниската
мотивација за почитување на безбедносните правила, претставуваат сериозни
предизвици за создавање на одржлива безбедносна култура. Примената на овие
препораки ќе овозможи постепено унапредување на безбедносните стандарди, заштита
на човечкиот капитал и развој на современо, еколошки и социјално одржливо шумарство
во Република Северна Македонија.
Клучни зборови: шумарство, безбедност при работа, здравје на работниците,
ризици, заштита при работа, институционална рамка, одржлив развој