Лекарска грешка

Abstract

Животот и здравјето на луѓето е неприкосновено круцијално право што е
почетен, воведен дел на Универзалните декларации врз кои ги гради и
унапредува останатите човекови права. Секој граѓанин на Република Северна
Македонија има право на сигурно и безбедно здравство. Медицинското право го
пробуди интересот на правниците.
Медицинската професија од памти век па сѐ до денес била една од
најценетите. Достојна за почит и почестена со многубројни ордени. Благородна
професија која се смета за чувар на здравјето на човекот. Здравствените
работници не се поштедени од проблеми и недостатоци со кои се соочуваат во
текот на нивниот работен стаж. Појавата на негативни појави во здравствениот
систем е доказ за недостатоци во здравствениот систем што се одразува
директно врз граѓаните.
Постои верување дека откога постои медицината постои и лекарска
грешка. Многу често се поаѓа од мислата: човек што не прави грешки ништо не
работи, но дали тие грешки се дозволени во медицината? Цената која се плаќа е
премногу висока односно највредното, сопствениот живот. Несаканите настани
оставаат дамки врз угледот на професијата, достоинството и честа врз лекарите
затоа што тие ја претставуваат медицината и целокупниот здравствен систем.
Лекарската грешка остава позади себе негативни последици и врз пациентите но
и врз лекарите. Но, не секој немил настан е лекарска грешка, лекарите
секојдневно се борат за да го вратат изгубеното здравје но не можат да се
изборат против законите на природата.

Keywords:

Лекарска грешка, несакан настан, здравствен систем, здравствени права
на пациентите, сигурно и безбедно здравство.