Компаративна анализа: анксиозност и депресивни симптоми кај негуватели на лица со дијагностицирана деменција

Abstract

Да се биде негувател на лице со деменција е емоционално и физички напорна улога,
која несомнено остава последици врз менталното здравје. Целта на ова истражување
е да се испита психолошката состојба кај членовите на семејството и
професионалните негуватели, кои се грижат за лице со деменција, со акцент на
анксиозно-депресивните симптоми како најчести нарушувања. Применет е
квантитативен метод, кој вклучува собирање на податоци преку стандардизирани
инструменти и прашалници, oдносно, користени се скали за проценка на
анксиозност и депресија, како и прашалник за собирање демографски податоци.
Истражувањето покажува дека семејните негуватели се повеќе изложени на
анксиозност и депресија во споредба со професионалните негуватели, најмногу
поради емоционалната приврзаност, физичките барања и недостатокот на поддршка.
Од друга страна, професионалните негуватели се соочуваат со други видови
стресори, меѓу кои и високите барања на самата работа, кои значително влијаат на
нивната општа благосостојба. Наодите од истражувањето укажуваат на итната
потреба од приспособени интервенции, како што се подобар пристап до поддршка за
ментално здравје, програми за управување со стрес и подобрувања во политиките на
работното место за да се препознае исцрпеноста на негувателите. Спроведувањето
на овие мерки не само што ќе ја подобри менталната благосостојба на негувателите,
туку и ќе придонесе за подобра нега на лицата со деменција.

Keywords:

негуватели, лице со деменција, анксиозност, депресија, ментално
здравје, емоционален товар, психолошки интервенции, програми за поддршка,
поддршка на негуватели, импликации на политиката