Јавното приватно партнерство и доброто управување во локалната самоуправа

Abstract

Генерално, денес на глобалната и современа економска сцена, јавното приватно
партнерство е современ облик на соработка помеѓу јавниот и приватниот сектор, како
во светот, така и во Република Северна Македонија. Одовде произлегува и основната
цел на овој магистерски труд, а тоа е да се придонесе за разбирањето на идејата за
партнерство и да се укаже на можноста за користење на целиот спектар на различни
модели на јавно приватно партнерство и добрите практики во единиците на локалните
самоуправи ширум земјава. Авторите од оваа област посветуваат внимание на
анализирањето на причините кои доведуваат до јавно приватно партнерство, главните
задачи кои се поставуваат пред јавното приватно партнерство, разноликоста на
структурите во кои се манифестира јавното приватно партнерство, како и предностите
и ограничувањата на јавното приватно партнерство. Во магистерскиот труд се
истражувани добрите практики и примени на истото во локалните самоуправи, како
процес на пренос на општествената сопственост од јавниот во приватниот сектор во
давањато на јавни услуги, користењето на претприемачкиот дух на приватниот сектор,
доброто владеење, вклучително и за нивото на одговорноста и ризикот на субјектите
носители на правата и обврските од оваа економско-правна работа. Имајќи предвид
дека јавното приватно партнерство (ЈПП) е релативно нова тема во Република Северна
Македонија, овој труд во прв план дава преглед на правната и институционалната
рамка за ЈПП, а потоа ги разгледува актуелните предизвици/слабости во врска со
законодавната рамка и рамката за носење на политики, институционалните капацитети,
односно органите на јавниот сектор и надворешните фактори, како и примената на
истите во единиците на локалната самоуправа, на еден добар и ефективен практичен
начин, како елемент во синџирот за добра соработка на институциите.

Keywords:

партнерство, приватно, локална самоуправа, практики.