Истражување на несреќи при работа

Abstract

Компаниите кои сакаат да се приклучат во предизвиците на сoвремениот пазар на
трудот имаат потреба од оптимални работни текови и ангажирани, компетентни и здрави
вработени. Модерната заштита при работа е повеќе од инструмент за избегнување на
несреќите на работното место и професионалните заболувања. Консеквентната безбедност
при работа бара здрави работни места, го зголемува квалитетот на работата и со тоа
обезбедува успех на компанијата.
Притоа многу важен инструмент е проценката на ризиците на работното место.
Законот за безбедност и здравје при работа им налага на работодавачите да ги откријат
опасностите кои се поврзани со работата, истите да ги проценат и да утврдат соодветни
мерки.
Важен показател за професионалниот ризик се и повредите на работното место и
професионалните болести, кои во многу земји претставуваат значаен проблем како за
работникот така и за работодавачите и државата. Во таа смисла, цел ни е анализата на
повредите на работното место, како основа за квалитетна проценка на професионалниот
ризик. За да се постигне тоа, неопходно е да се утврдат опасностите и штетностите на
работното место од една страна и тежината на можните последици.
Бројот на повреди на работното место регистрирани во одделни временски периоди
укажува на значењето и големината на проблемот. Заради тоа, статистиката на повредите на
работното место е повеќе од потребна за образложување на реалните проблеми за
спречување на повреди, како и за дополнителна контрола на ефикасноста на преземените
мерки за спречување на повторно настанување на повреда на работното место.
Главната поента на овој труд, а тоа е дека безбедноста и здравјето при работа, во
денешно време, секако е едно од најважните прашања со кои се соочуваат компаниите, а
целта на безбедноста и здравјето при работа е да се постигне максимално ниво на
психофизичка и здравствена заштита.

Keywords:

Безбедност и здравје при работа, повреди на работно место, истражување
на несреќи при работа,работници