Унапредување на заштитата при работа кај карактеристични градежни работи

Abstract

Превенцијата од повреди на работа, посебно кај градежните работници, грижата за
условите во кои работниците ги извршуваат своите градежни работни задачи како и
унапредувањето на здравјето на сите учесници во работниот процес бил насочен кон
заштита пред се на работниците. По осамостојувањето на Република Македонија донесен
е Закон за заштита при работа кој ги уредува мерките за заштита при работа, обврските на
работодавецот и праватa и обврските на работниците во безбедноста и здравјето при
работа. Со овој закон се опфатени мерките, средствата и методите за создавање на
безбедни услови за работа, каде заштитата при работа е составен дел од организацијата на
работата и на работниот процес и неа ја организира, уредува и обезбедува работодавецот.
Законот за заштита при работа се однесува на сите видови дејности и во него во
потполност не се опфатени сите мерки за заштита при работа, поради што се донесени
повеќе Правилници со кои се уредува областа на заштитата при работа. Во мај 2006
година Владата на Република Македонија ја донесе Националната стратегија за здравје,
здрава животна и работна средина и безбедност при работа каде со акт за организација на
Министерството за труд и социјална политика, предвидено е oдделение за легислатива во
секторот за заштита при работа во составот на Државниот инспекторат за труд, кое има за
цел усогласување на домашните прописи од областа на безбедност и здравје при работа со
прописите на Европската Унија. Како резултат од оваа активност во јуни 2007 година е
донесен Закон за безбедност и здравје при работа кој е нов, современ закон во потполност
усогласен со директивите на Европската унија.Политиката за безбедност и здравје треба
да ја одрази одговорноста на работодавачите за обезбедување на безбедна и здрава
работна средина. Според Законот за безбедност и здравје при работа “работодавач е
физичко или правно лице одговорно за работата и вработените кое ги користи услугите на
вработен според договор за вработување, физичко или правно лице кое ги користи
услугите на вработен на некоја друга правна основа.”

Keywords:

безбедност, работници, здравје