Улогата на менаџментот на човечки ресурси во функционирањето на јавната администрација, со посебен осврт на центрите за социјална работа во Пелагонискиот плански регион во Р.С. Македонија

Abstract

Државата како социјален институт има голем број карактеристики и функции што ја разликуваат од другите институции. Меѓутоа, таа не може самостојно да ги исполни своите обврски и затоа ги спроведува со доделување моќ и слободи на одредени граѓани, односно преку државните службеници. Соодветно, државните службеници извршуваат одредени должности во согласност со занимањето на позиција во јавната служба. Како и секој друг персонал, така и овој персонал подлежи на систем за управување со човечки реурси, кој се перцепира како еден од механизмите за спроведување на политиката за човечки ресурси на управувачкото тело. Овој систем е исто така збир на организациски, социо-економски и други активности кои имаат правна и регулаторна рамка на активности, овозможувајќи рационално користење на вештините на вработените и во негов интерес и во интерес на организацијата. Оваа работа е посветена на управување со човечките ресурси во јавната администрација, со посебен осврт кон центрите за социјална работа. Интересот за темата е оправдан со спецификите на управувањето со персоналот во овој сектор, кој е претставен како сложен, на мулти-ниво и во исто време креативен процес во кој се присутни организациски, социо-психолошки, правни, економски, морални и други фактори. Покрај тоа, специфичноста на јавниот сектор одредува голем број барања за вработениот во јавната администрација, кои вклучуваат првенствено неутралност, непристрасност, строга дисциплина и почитување на законот. Во исто време, активноста на вработениот во јавната администрација се одвива во рамките на законските прописи, што во голема мера ги предодредува карактеристиките на управувањето со персоналот во јавниот сектор.

Keywords:

менаџмент, човечки ресурси, јавна администрација, центар за социјална работа, социјална заштита.