Поврзаност помеѓу користење на Инстаграм, самодоверба и депресија кај адолесцентите

Abstract

Луѓето во 21 век стануваат робови, зависни од технологијата и не се ни свесни за влијанието што таа го има врз нив. Со користењето на мобилните телефони, луѓето речиси секогаш имаат информации при рака и можат да ги следат најновите настани и трендови. Со доаѓањето на новите технологии, сѐ повеќе луѓе се движат од физичкиот кон виртуелниот свет. Овој виртуелен свет понекогаш му обезбедува на човекот сигурност и заштита од реалните животни ситуации, афирмација на неговите вредности, а со тоа и бегство од суровата реалност. Но, со сите позитивни аспекти на интернетот, човекот не може да ги избегне негативните аспекти кои можат да влијаат врз неговиот живот. Всушност, најголемиот проблем се јавува кај младите луѓе чиј физички и ментален развој сè уште е во нагорна линија, кога немаат чувство за припадност и се чувствуваат поинакви од другите. Кога бегаат од реалноста, тие често се губат во некои примамливи содржини на интернет, без да размислуваат како и колку тоа ќе влијае на нивното ментално здравје. Времето поминато на социјалните мрежи, количината и разновидноста на мултимедијалните содржини, сеприсутноста и достапноста на интернет, се сите ставки кои имаат краткорочни и долгорочни последици врз животот на една личност. Денес, животот без екран во неговите различни форми, од мобилните телефони и компјутери до телевизијата, е незамислив. Децата се особено изложени поради тоа што долго време се оставени сами на себе, што доведува до фактот дека виртуелниот свет станува засолниште кон кое сѐ почесто се прибегнува.