Професионални ризици кај медицински сестри и примена на превентивни мерки во јавни и приватни здравствени установи

Abstract

Медицинските сестри се голема група здравствени работници, кои поради природата на нивната работа се изложени на голем број потенцијално опасни ситуации и супстанции. Професијата медицински сестри се карактеризира со високо чувство на лично задоволство и достигнување, но динамичната работна средина што вклучува различни профили на работници и високо специјализирана технологија може да претставува значителен ризик за нивното здравје, а здравите медицински сестри се неопходни за обезбедување квалитетна грижа за пациентите. Цел на истражувањето е да се дојде до сознанија за застапеноста, на различните видови професионалните ризици на медицинските сестри и примената на превентивните мерки поврзани со нив, за евентуалните разлики во изложеноста на професионалните ризици и примената на превентивните мерки во работата на медицинските сестри во зависност од тоа дали здравствената установа е јавна и приватна, како и до сознанија за поврзаноста помеѓу примената на превентивните мерки и застапеноста на професионалните ризици меѓу медицинските сестри во здравствениот систем во нашата земја. Примерокот на истражување го сочинуваат 120 медицински сестри, од кои 60 се од јавни и 60 од приватни здравствени установи. За собирање на податоците применети се Прашалник за професионални ризици кај медицински сестри и Прашалник за примена на превентивни мерки за професионални ризици кај медицински сестри. Добиените резултати покажаа дека професионалните ризици во работата на медицинските сестри, јавните здравствени установи се застапени во повисок степен во споредба со приватните здравствени установи, превентивните мерки за професионалните ризици во поголем степен се применуваат во приватните здравствени установи споредено со јавните, а исто така покажаа дека постои статистички значајна негативна корелација помеѓу примената на превентивни мерки и застапеноста, односно, изложеноста на професионални ризици на медицинските сестри во здравствените установи.