Трговијата со луѓе како дел од организираниот криминал

Abstract

Овој магистерски труд претставува сеопфатна анализа на трговијата со луѓе како составен дел од организираниот криминал, со посебен фокус на нејзините правни, институционални и социо-економски аспекти. Истражувањето се заснова пред се на правен пристап кој ги опфаќа историските корени на феноменот, неговите современи манифестации, како и комплексната меѓународна и национална регулатива што ја уредува оваа појава. Во рамките на трудот е извршена детална теоретска и нормативна елаборација на поимот, преку осврт на меѓународни инструменти, како и на домашната правна рамка во Република Северна Македонија. Особено внимание е посветено на функционирањето на институциите, нивната улога и капацитет во борбата против трговијата со луѓе, вклучително и специјализираните тела и механизми на превенција и санкција.
Преку анализа на судска пракса, студии на случаи и компаративни примери од европски држави како Италија, Норвешка, Русија, Шпанија и Холандија, трудот настојува да ги прикаже моделите на организирано делување кои ја одржуваат трговијата со луѓе како профитабилен и ниско ризичен криминален бизнис. Додадена е и прецизна разработка на улогата на меѓународни и локални невладини организации, нивниот придонес во поддршката на жртвите и создавањето јавни политики.
Во последниот дел е вклучена и анализа на релевантната судска практика на Европскиот суд за човекови права во контекст на член 4 од Европската конвенција за човекови права, со осврт на прашања поврзани со експлоатација, заштита и одговорност на државите. Истражувањето завршува со методолошка рамка, резултати, анализа на хипотези и препораки за унапредување на борбата против трговијата со луѓе.